“Кыргызстандын дипломаттары” коомдук бирикмеси кеңешинин Төрайымы, Кыргыз Республикасынын мурдагы тышкы иштер министри, СССРдин Атайын  жана Ыйгарым укуктуу 1-класстагы кенже Элчиси, “Манас” орденинин кавалери,         Туменбаева Жаңыл Туменбаевнага  Кыргыз дипломатиясына кошкон зор салымы үчүн окуу жайдын Окумуштуулар кеңешинин чечими менен Эл аралык Кувейт университетинин “Ардактуу профессору” наамы ыйгарылды.

Жаңыл Туменбаевна 2023-жылдан бери Эл аралык Кувейт университетинин “Эл аралык мамилелер” кафедрасынын алдындагы “Дипломаттар клубунда” келечек жаш дипломаттарга кызыктуу лекцияларын тартуулап келет. “Эл аралык мамилелер” багытында билим алып жатышкан студенттер үчүн профессор Жаңыл Туменбаеванын өрнөктүү өмүрү, берген билими жана тарбиясы баа жеткис байлык болуп эсептелет.

     Эл аралык Кувейт университетинде “Кыргыз Республикасынын Президентинин 2024-жылдын 18-декабрындагы ПЖ №369 Жарлыгы менен бекитилген Кыргыз Республикасынын “Улуттук дем - дүйнөлүк бийиктик” уңгужолун жүзөгө ашыруунун алкагындагы “Уңгужол — жаштардын келечеги жана биримдиги” аттуу Эл аралык Кувейт университетинин 25 жылдыгына арналган ЖОЖдордун студенттери үчүн уюштурулган кереге кеңеш болуп өттү. 

     Кереге кеңеште элибиздин улуулугу, жаштарын табиялоодогу даанышмандыгы, билим алуу менен илим изилдөөдөгү келечек муундун орду, биримдиги, келечеги сыяктуу окулган жана кызуу талкуу жараткан кызыктуу баяндамалардын ээлерине жана иш-чаранын жигердүү катышуучуларына атайын тастыктамалар тапшырылды.

Эл аралык Кувейт университетинде Кыргыз Республикасынын 2024-2025-окуу жылына карата Жогорку окуу жайлар аралык спорттук универсиадага катышып байгелүү келишкен жаш спортчу студенттерди жана алардын машыктыруучуларына салтанаттуу сыйлык тапшыруу аземи болуп өттү.

Куттуктоо сөзү менен чыккан Эл аралык Кувейт университетинин ректору, профессор Аскарбек Эсенович Байсеркеев  мелдештерде намысын коргогон мыкты жаш спортчуларды тарбиялоодо зор салым кошкон машыктыруучу окутуучуларга студенттердин  байгелүү келишине талыкпаган эмгек жумшагандыктарын баса белгилеп,  жеке өзүнүн жана окуу жайдын жалпы профессордук-окутуучулар жамаатынын атынан ыраазычылык билдирүү менен иштерине чыгармачылык ийгиликтерди жана бекем ден соолук каалады. Ал эми университеттин намысын коргоп, спорттук оюндарда өзүлөрүнүн мыктылыгын көрсөткөн жаш спортчу студенттерге мындан кийинки мелдештерде да алдыңкы байгелүү орундарга ээ болуп, окуу жайыбызга гана эмес республикага, дүйнөгө таанымал Ата Мекенин чын дилден сүйгөн спортчулардан болушуна тилектештигин билдирди.

Ошондой эле Араб филологиясы кафедрасынын башчысы, доктор, профессор Фадлаллаха Абдулраззак Мохаммад  Катран дагы өз куттуктоо сөзүндө сыймыктуу спортчулар менен машыктыруучуларына кең келечек жана чыгармачылык ийгиликтерди каалады.

Иш-чаранын көркү болгон спортчуларды Эл аралык Кувейт университетинин жалпы жамааты кызыл килем үстүндө тосуп алып, аларга баалуу белектер жана ректордун атынан ыраазычылык барагы тапшырылып, окуу жайдын таланттуу студенттеринин ыр белеги менен жыйынтыкталды.

Эл аралык Кувейт университетинде эки жылдан бери уюштурулуп келе жаткан “Келечектүү коом жаштары” тренерлер мектебинин окуу жайдагы бардык даярдоо багыттарындагы билим алып жатышкан старосталарынын билимин жогорулатууга жана лидерлик жөндөмдөрүн өркүндөтүү максатында атайын  курстары өз ишин аяктады.  Бир ай убакыт аралыгында тайпа старосталары адеп-ахлак, Ата Мекендин тарыхы, кыргыз элинин маданияты, мамлекеттик тил, психология, дүйнөлүк экономика жана статистика, бизнес, азыркы учурдагы экология маселелери, дипломатия, укук, азыркы учурдагы интеллигенциянын коомдогу орду, лидерлик сапаттар тууралуу кенен маалыматтарга жана көндүмдөргө ээ болушту. Сабактар интерактивдүү усулдар менен коштолуп, талкуу жана өз ара кызыктуу диалог менен коштолду.

Тренерлер мектебинде Эл аралык Кувейт университетинин профессордук-окутуучулар курамынан жана конок лекторлор атайын чакырылып студенттерге билимин тартуулашты. Айрым сабактар алыскы өлкөлөрдөн online форматында атайын Zoom программасы аркылуу өтүлдү. Курстар өз ишин аяктап студенттер 72 сааттык билимдерин аныктаган тастыктамалары менен, ал эми  лекторлор ректордун атайын ыраазычылык барактары менен сыйланышты.

Эл аралык Кувейт университетинин  студенттери үчүн “Келечектүү коом жаштары” тренерлер мектебинин группа старосталарынын лидерлик жөндөмдүүлүктөрүн өркүндөтүүгө арналган  72 сааттык  курсуна зор салым кошкон лекторлор:

1. Аалиева Ширин Карыбековна – ЭКУнун “Социалдык-гуманитардык, табигый дисциплиналар” кафедрасынын профессору, Кыргыз Республикасынын билим берүүнүн мыктысы, философия илимдеринин кандидаты;
2. Аламанов Саламат Күлөмбекович – Кыргыз Республикасынын Атайын жана Толук Ыйгарым укуктуу Элчиси, Кыргыз Республикасынын “Даңк” медалынын ээси, профессор, география илимдеринин кандидаты;
3. Бейшеева Бактыгүл Кубатбековна – ЭКУнун Кесиптик орто билим берүү бөлүмүнүн психологу, Казакстан Республикасынын Аймактык башкаруу академиясынын “Социалдык илимдер” боюнча доценти;
4. Болджурова Ишенгуль Садыковна – Кыргыз Республикасынын мурдагы Билим берүү жана илим министри, Кыргыз Республикасынын Атайын жана Ыйгарым укуктуу Элчиси, Кыргыз Республикасынын билим берүүсүнө эмгек сиңирген кызматкери, профессор, педагогика илимдеринин доктору;
5. Босумбаева Чынара Джоомартовна – ЭКУнун “Юриспруденция” кафедрасынын ага окутуучусу, Кыргыз Республикасынын “Юристер бирикмесинин” ардактуу мүчөсү;
6. Жамалбекова Гүлнур Асанбековна – ЭКУнун “Социалдык-гуманитардык, табигый дисциплиналар жана дене тарбия” кафедрасынын доценти, Кыргыз Республикасынын билим берүүнүн мыктысы, Кыргыз Республикасынын Президентине караштуу Мамлекеттик тил жана тил саясаты боюнча улуттук комиссиянын “Кыргыз тили” төш белгисинин ээси;
7. Маденов Аскер Дурусбекович – ICON.KG куруш компаниясынын негиздөөчүсү жана башкы директору;
8. Нуралиев Марат Абдыкеримович – Кыргыз Республикасынын мурдагы Жаштар, эмгек жана иш менен камсыз кылуу министринин орун басары, Азыркы мезгилдеги Кыргыз Республикасынын Катар мамлекетиндеги Атайын жана Ыйгарым укуктуу элчиси, Эл аралык Кувейт университетинин алгачкы сыймыктуу бүтүрүүчүлөрүнүн бири;
9. Таирова Нурмира Шайыбековна - Кыргыз Республикасынын Катар мамлекетиндеги Атайын жана Ыйгарым укуктуу элчисинин жубайы, Эл аралык Кувейт университетинин Гуманитардык жана табигый илимдер факультетинин тажрыйбалуу мурдагы кызматкери;
10. Токторбаева Калина Авлабековна – ЭКУнун “Экономика жана менеджмент кафедрасынын” профессору, экономика илимдеринин доктору, Кыргыз Республикасынын Улуттук статистика комитетинин ишине эмгек сиңирген тажрыйбалуу адиси;
11. Шалпыков Канатбек Абдыкаимович – ЭКУнун “Экономика жана менеджмент кафедрасынын” доценти, экономика илимдеринин кандидаты. “Кыргыз Кредит Банк” ААКнун мурдагы төрагасы, Кыргыз Республикасынын банк иштери, экономика жана каржы маселелери боюнча тажрыйбалуу адиси.